2019年7月23日 星期二

[長文]永遠不會忘記這72小時

生左小b到依家差唔多半年,好想好好記錄一下呢個難忘既72小時生仔過程。

預產期:年初八(12/2)

年初四(8/2)
年三十已經開始放產假,不過新年都好乖,無乜點去邊度拜年,怕太長途同人多。年初四本來諗住去完產檢返公司做個簡單開工儀式同食燒肉,順便拎埋開工利是就番屋企休息。點知起身發現自己見紅,但又未有陣痛,十五十六之際,問左個媽媽朋友,佢建議我入院。沖咗涼食早餐執好野就自己坐的士入院。

搞好入院手續,有姐姐帶我上產房,換上入院衫,護士幫我做簡單檢查先。之後帶我入產房做檢查,入去前要關電話,簡單同老公講聲就入去產房做檢查(完全無緊張或者驚,可能覺得未係時候)。訓係度聽心跳差唔多兩個鐘,之後護士同我講可以出產房行下,食飯先入番去。甘我就出左去同老公講電話,同佢講我無乜動靜,因為已經無見紅同一啲陣痛都無,可能可以返屋企,叫佢放工先再來探我。去到下午已經轉左我去產前/產後房,呢度好啲可以用電話;不過護士話我要留一晚第二日再睇情況先決定俾唔俾我走。

年初五(9/2)
就係咁訓咗晩,起身後又係無乜動靜,於是問護士可唔可以返屋企,佢話要等醫生檢查先。等到醫生來,佢話可以走,仲叫護士同我約期催生(好似約左預產期既一星期後),心諗要催生甘嚴重,不過有得走就無理咁多。臨走前發現見紅多左,同護士講佢話正常係咁,叫我如果有陣痛或血量多要即刻入院,跟住返左屋企休息。

年初六(10/2)
我期待既一日,因為契女會來我家拜年,點知....半夜開始已經訓得唔好,唔知做乜,好似M痛咁,訓下醒下到八點,諗諗下呢啲係咪所謂嘅陣痛呢?於是上網check下同開始計時間,等老公起身就同佢講我呢個情況,佢就話不如入院,我係有啲唔想,因為想見下契女,但又唔想小b有咩事,於是我又再次入院。

又去到熟悉的環境,已經有第一次經驗,所以都知道個情序,去到食lunch先可以見到老公,不過護士話無咁快生得,仲叫我行多啲。之後我仲玩埋嗰個健身波,希望有啲動靜,食完晚飯覺得陣痛密咗,同護士講佢都係話未得,有排,即刻心都灰左。

夜晚訓覺訓得唔好,個肚好痛,多次出出入入洗手間,又唔想嘈醒其他人,自己喊都要細細聲。終於去到零晨兩點左右,有護士見我企係度問我做乜,我話痛到訓唔到想企下,佢幫我做檢查,又係嗰句「未得呀,有排,一度都未有」。乜痛成咁連一度都無?

年初七(11/2)
真係無乜點訓又累,個肚好痛但又未痛到要叫,記起朋友講過要誇張少少先有人理我。等到醫生來,本來佢唔係睇我先,但我痛到坐唔到要挨住個床邊,醫生見到我咁就同我檢查先,一檢查完就話我已經開到4度,叫我執野落產房。終於可以生拉,點知醫生話我係第一胎無咁快生得,估計大概下午可以生。仲要等甘耐?我又好冷靜咁叫老公放半日假lunch後先來。

落到去產房,去咗一邊係等生嘅area,之前係隔離個area完全唔知道d人等生嘅情況,嚟到呢度忽然有d驚。開頭逼自己訓覺,盡量唔聽d媽媽呼叫,護士不斷重複唔好叫要留氣。去到唔知幾點,我已經忍唔到,狂呼叫。其實又唔係好痛,不過就係嗰下叫出來會舒服啲,但係護士又係嗰句,未得呀留啖氣。

又唔知到幾點,我盡量用呼吸法去舒緩痛楚,但有時候真係唔得,覺得要生咁,呢個時候助產士好似考試咁,由頭到尾講同做一次俾佢上師睇,我唔理佢捉住佢隻手問幾時生得,佢又係咁問我係咪要去廁所,我朝早起身已經飲唔落水而且早餐啲粥都食唔曬,難道咁都有得去嗎?

終於等到醫生來檢查,問我一至十有幾痛,我話九,之後佢同護士講左幾句就走左。跟住護士就同我講依家推你入產房生仔,我嗰刻好開心因為可以卸貨。呢個時候護士話我老公已經到咗,問我佢係咪會陪產,其實當初問過老公佢話會陪產,但係我突然唔想佢見到我生仔個樣,所以無俾老公入來陪產。

護士準備好就叫我試生,但係原來無乜點食過野同無飲過水嘅我已經無乜力氣,期間佢地叫我休息一下,但係仲辛苦仲難過。每次當我想生嘅時候,護士都叫我試下,但都唔成功,過咗一個鐘左右,突然一大班護士加助產士入咗來同我加油打氣叫我依家試下用力生。當然試咗幾次都係唔得,係呢個時候話見到小b嘅頭髮,佢哋同我打氣,正當諗住試埋呢次都唔得就叫老公入來陪我,點知有個好似資深啲嘅護士係我肚度一推,我以為又要用力之際,突然聽到bb喊聲加一句恭喜,我生b成功。即刻多謝咁多位護士,佢哋抹乾小b個身就抱俾我肌膚之親,嗰刻好感動,護士叫我打電話俾老公入來見下小b,點知打咗兩次都搵唔到佢,後來仲要等病床先可以推走我,所以老公等咗幾個鐘先見到小b。事後我有問佢有無唔開心因為我拒絕俾佢陪產,佢話無,仲多謝我辛苦生了小b,從始開始我們的仨人生活。






謝謝你們在我身邊!



~以上文章純屬筆者的個人感覺、分享,敬請注意 !~

*歡迎留言或聯絡*
s.berryblythe@gmail.com
Blog: strawberryblythe.blogspot.hk
FB: S.BerryBlythe
IG: s.berryblythe

沒有留言:

張貼留言