【士多與寶寶】當媽媽後發現各種技能Level up

母親節就快到啦，祝各位媽媽母親節快樂！

最近發現自己當媽媽後，除咗生活轉變，原來好多隱藏技能不知不覺間表現出嚟，真係覺得好amazing。

1. Chef Mama

當小b進入加固階段，便開始研究有咩食物啱佢食，煮下粥仔、容易咀嚼嘅食物等，平時少下廚嘅我為咗小b會繼續努力做好chef mama呢個角色。

2. 大力士

小b依家嘅體重真係有番咁上下，雖然已經唔係成日抱佢，不過當小b枑計、嗲你嘅時候真係唔可以唔抱一陣，不過唔好以為抱咁簡單，小b係咁爬嚟爬去，唔大力hold住佢真係好容易手軟跌落嚟。

一出街再唔係一個小手袋，拎住小b啲食物尿片仲有N樣嘢，真係好似走難咁呀，小啲力水都唔得。

3. 小b嘅聆聽者

小b依家係牙牙學語狀態，有時講嘢有時好似唱歌咁，我通常會坐喺度問佢做緊咩或者回應下佢，睇吓佢有咩反應，我發現如果同佢傾下計，佢會肯講多啲野，雖然唔知佢想講咩，但係溝通都好重要。

4. 長氣

小b開始對身邊嘅野好奇，當然會亂咁扒亂咁搞搞陣，唔想成日大聲呼喊，唯有喺咁同佢講唔可以呀、危險呀、小心啲等，自己都覺得長氣咗。

我相信我仲有其他技能會一一展示出嚟，因為我同小b一齊成長一齊探索呢個世界。